Политичкиот директор на ЕУ, Енрике Мора, денеска изјави дека е сосема сигурен дека ќе се постигне конечен договор за заживување на Договорот за иранската нуклеарна програма.

– Постигнавме значителен напредок во изминатите 10 дена, но има уште работи на кои треба да се работи и ќе се сретнеме повторно следната недела, ќе продолжиме да работиме, изјави Мора на крајот од четвртата рунда разговори во Виена.

Мора ги координира индиректните разговори меѓу Иран и САД.

Во Виена се одржуваат разговори за спас на Договорот за иранската нуклеарна програма од 2015 година. Преговарачите од Велика Британија, Франција и Германија и Русија и Кина се обидуваат да ги убедат Иран и САД да се вратат на Договорот. Поранешниот американски претседател Доналд Трамп еднострано се повлече во 2018 година, и оттогаш Техеран постепено ги крши своите одредби.

Според Договорот, на Иран му е дозволено само да збогатува ураниум на ниво од 3,67 проценти. Минатиот месец достигна ниво од 60 проценти, приближувајќи се кон можноста за развој на нуклеарна бомба.