Претседателот на Собранието, Талат Џафери, вечерва во гостување на ТВ „21“ порача дека мора да има премиер Албанец 100 дена пред избори, бидејќи таков бил политичкиот договор меѓу СДСМ и ДУИ кога се формирала Владата.

„Нема компромис за ова, премиерот мора да биде Албанец 100 дена пред избори. Ова е политички договор помеѓу СДСМ и ДУИ, за ова сме договорени и така ќе биде. За ова знаат и во СДСМ и немаат ништо против“, рече Џафери.

На прашањето дали по изборите ДУИ би коалирала со ВМРО-ДПМНЕ, тој рече дека „во политиката никогаш не се вели никогаш“.

„Хипотетички не може да се зборува во дефинитивна форма, во политиката нема дефинитивна форма за последователни прашања бидејќи тоа не е работа за која одлучуваат политичките субјекти. Последователните прашања по изборите се прашања за кои се разговара во партиските тела и тоа не зависи од конкретната позиција што мисли денес Талат Џафери како претседател на Собранието, бидејќи ние го немаме тоа овластување. За среќа или за жал, декларации не се даваат и менуваат секој ден, а во политиката тоа е основна работа која никогаш не се кажува во дефинитивна форма“, рече Џафери.