По најавите за воведување на медиумска писменост и критичко мислење во образовниот процес за учениците од прво и четврто одделение, од МОН посочуваат дека целта е децата од мали да развијат критичко и креативно размислување.

– Учениците треба да научат како да препознаваат што е вистина, а што е лага и преку анализа на факти и истражување да носат заклучоци. Затоа воведуваме наставни содржини учениците од најмала возраст да учат да пребаруваат, издвојуваат и користат информации од медиумите, но и да ги проверуваат и откриваат лажните вести – велат од МОН за „Слободен печат“.

Оттаму објаснуваат дека согласно новите реформи овие содржини ќе бидат системски интегрирани во сите предмети за учениците од овие одделенија, а покрај наставните програми, од МОН потврдија и оти се работи на обука на наставниот кадар.

– МОН интензивно работи и на подготовка на наставниците да знаат да го пренесат критичкото размислување кај учениците. Заедно со Светска банка, во наредниот период ќе се работи и на јакнење на наставните студиски програми на педагошките факултети, кои ќе образуваат наставници подготвени за реализирање на новите наставни програми – додаваат од МОН.

Главната цел на воведувањето на медиумската писменост пак, од Министерството велат оти е борбата со лажните вести, односно еден вид на превенција за кризни ситуации креирани со лажни вести.