Канадската порота по шестнеделното судење го прогласи поранешниот моден могул Питер Најгард за виновен за сексуален напад, пишува „Би-би-си“.

Обвинителите изјавија пред судот во Торонто дека 82-годишниот Питер Најгард ја искористил својата позиција за да нападне пет жени во серија инциденти од крајот на 1980-тите до 2005 година.

Најгард ги отфрли обвинувањата, а неговиот правен тим ги обвини жртвите дека сето тоа го прават за финансиска корист.

Поранешниот моден магнат беше прогласен за невин по пет точки од обвинението за сексуален напад и една точка за присилно затворање. Тој не покажа никакви емоции кога беше изречена пресудата.

Според обвинителството, Најгард ги намамил жените – на возраст меѓу 16 и 28 години за време на инцидентот – во приватна луксузна спална соба во седиштето на неговата фирма во Торонто.

Обвинителката Ана Сербан опиша дека собата има „огромен кревет, бар и неколку врати кои се без кваки, но со автоматски брави контролирани од Питер Најгард“. Таа објасни дека Најгард ги напаѓал жените кога биле заробени во собата.

Адвокатот на модниот могул, Брајан Гринспен, им рече на поротниците дека случајот презентиран од обвинителите се базира на „ревизионистичка историја“ изградена на „противречности и инсинуации“. Тој исто така тврди дека четири од петте жени кои заеднички ја поднеле тужбата биле мотивирани од финансиска корист.

За време на тензичното сведочење и вкрстено испрашување за време на судењето, Најгард рече дека никогаш неби  можел да постапи „на тој начин“ и дека не може да се сети на четири од петте жени.

Обвинителите многу се потпираа на доказите што жените ги презентираа на суд. Обвинителката Сербан рече дека поротата „не треба да има потешкотии“ да го прогласи Најгард за виновен и дека доказите презентирани на судот од различни жени го опишале „истиот простор и истото однесување“ на поранешниот могул.

Најгард, чие богатство некогаш се проценуваше на 700 милиони долари, се соочува со ново судење во Монтреал следната година под слични обвиненија за напад и присилно затворање во Винипег.

Откако ќе завршат тие криминални случаи во Канада, милионерот ќе биде екстрадиран во САД, каде што властите велат дека бил вклучен во „децениска шема на криминално однесување“, а во која се вклучени најмалку десетина жртви ширум светот. Најгард се обидува да најде правни начини да ја избегне таа екстрадиција.

Пресудите го нарушија угледот на Најгард, кој некогаш беше познат по дружењето со познати личности и политичари на неговите луксузни имоти.

Во февруари 2020 година, тој поднесе оставка како претседател на„Нјагард интернејшнал“ (Nygard International) непосредно пред да поднесе барање за стечај откако американските власти извршија рација во нејзиното седиште во Њујорк. Тој е во затвор од неговото апсење во декември истата година.