Индискиот премиер Нарендра Моди се враќа од Париз со орден, но и со договор за купување три француски подморници од класата „скопрен“ и 26 борбени авиони „рафал“. Договорот, проценет на речиси 10 милијарди евра, е во завршна фаза.

Зделката ќе ѝ овозможи на Индија да ја зајакне одбраната на океаните и морињата кон кои гравитира, а на Франција да се пробие на пазарот со 1,4 милијарда потенцијални консументи и да го одврати Њу Делхи од купувањето оружје од Русија. Францускиот енергетски гигант „ЕДФ“ со години преговара за изградба на шест нуклеарни реактори во Индија, а компанијата „Алстом“ испорачува возови за индиските железници.

Високиот гостин од Индија беше во свечената ложа на Елисејските полиња на парадата по повод Денот на Бастилја, а францускиот претседател Емануел Макрон ја искористи приликата за да го одликува Моди со „Големиот крст на Легијата на честа“ поради „улогата на премиерот во одличниот однос на пријателство и доверба што ги обединува Франција и Индија во 25-годишното стратегиско партнерство“.