Во мобилни крематориуми распоредени на украинска територија, руската армија ги пали телата на убиените цивили за да ги прикрие своите воени злосторства, но и телата на загинатите руски војници за да ги прикрие своите загуби, соопшти военото разузнавање на украинското Министерството за одбрана, но нема потврда за ова од руска страна.

Според украинската страна, Русија со ова сака да го скрие реалниот број на свои загинати војници во Украина, но и да одбегне плаќање отштета на семејствата на загинатите војници.

-Снимката од Буча го обиколи светот и го покажа вистинското злобно лице на агресорот, кој без причина започна војна од сите размери. Руската армија испрати мобилни крематориуми во Мариупол, како и во регионите Чернихив и Луганск. Само во Мариупол Русите имаат 13 мобилни крематориуми. Окупаторите бараат и сведоци на воените злосторства за да ги убијат, соопшти украинското Министерство за одбрана.

Инаку, градот Мариупол беше уништен од руките сили за само неколку недели, а бројот на цивилни жртви украинските власти го проценуваат на над 20.000. Освен што убивале невооружени цивили, руски војници силувале и малолетни девојчиња во Украина, вели истиот извор непотврден од другата страна.

Американскиот претседател Џо Бајден вчера за прв пат од почетокот на воената инвазија изјави дека Русија врши геноцид во Украина. Францускиот претседател Емануел Макрон се воздржа да го употреби тој термин.