Во библиотека во германскиот град Лајпциг е откриено досега непознато дело на познатиот композитор Волфганг Амадеус Моцарт, за кое се верува дека е напишано кога тој бил во тинејџерските години.

Делото датира од 1760-тите и се состои од седум минијатурни движења за гудачко трио кое трае околу 12 минути, соопштија денеска општинските библиотеки во Лајпциг.

Истражувачите го откриле делото во градската музичка библиотека додека го составувале последното издание на каталогот „Кохел“, комплетна архива на музичките дела на Моцарт.

Новооткриениот ракопис не го напишал самиот Моцарт, но се верува дека копија е направена во околу 1780 година.

Композицијата денеска ја изведе гудачко трио на откривањето на новиот каталог „Кохел“ во австрискиот град Салцбург, а премиерно ќе биде изведена во Германија во сабота во операта во Лајпциг, пишува „Гардијан“.

Делото се споменува во каталогот како „Многу мала ноќна музика“ („Ganz kleine Nachtmusik“), според библиотеката во Лајпциг.

Ракописот се состои од темно кафеаво мастило на рачно изработена бела хартија, а парчињата се индивидуално врзани, велат истражувачите.

Каталогот го опишува делото како „сочувано во еден извор, во кој атрибуцијата на авторот сугерира дека делото е напишано пред првото патување на Моцарт во Италија“.