Дури 105 домашни ресторани се позиционирани на најновиот Регистар на Министерството за економија, а најголемиот дел нив се категоризирани со 3, но има и такви кои гордо ги носат своите 4 ѕвездички. Помал дел се означени со две, а на само три ресторани на оваа листа „свети“ само една ѕвездичка. За жал, додека во регионот се множат угостителски објекти со Мишелин ѕвездичка, тоа кај нас е речиси невозможна мисија.

Што „осветлуваат“ ресторански ѕвезди? Ваквото признание се темели на нивото на услугите кои ги добиваат гостите, велат експертите. Аркан Керим, претседател на Туристичко-угостителската комора, за „Слободен печат“, објаснува дека никаде во светот нема категоризација на рестораните, а единствената меродавна оценка е поседувањето на Мишелин ѕвездичката, која кај нас не е присутна. Сепак, според него, најдобрата категоризација ја даваат гостите – што ќе рече дека оние кои се нон-стоп полни се со најдобра услуга и храна.

-Странските туристи се многу се задоволни од Македонија како дестинација. Убавата природа, преубавата гастрономија и прекрасните вина се главниот адут на туристичките работници. Секако дека има забелешки и за хигиената, за жал, и за сервисот на услугите, но генерално, поради недостигот на работна сила, туристите со разбирање го прифаќаат овој недостиг бидејќи ова е веќе глобален проблем. Сепак, домашните угостители се трудат максимално да ги следат светските трендови и затоа ќе речам дека високите оценки се од гостите кои се задоволни од услугата – објаснува Керим.

Претседателот на Туристичко-угостителската комора вели дека по трагедијата во Кочани, мора да се почне одново со категоризирањето на рестораните и да се внимава на сите строги стандарди за заштита на гостите, но и на персоналот.

-Сегашната категоризација е застарена и треба да претрпи промени, за да се види дали се почитуваат строгите правила за противпожарна заштита. Никаде во светот нема ваква категоризација како кај нас, а единствено е валидна оценката на Мишелин, што кај нас го нема – додава Керим.

Како што се ближи 2028 година, кога Скопје ќе биде Европска престолнина на културата, потребна е засилена промоција на главниот град, за да постигнеме рекорден број на туристи. Тоа според Керим подразбира организација на македонски вечери со најубавите македонски вина, млечни производи, ајвари и друга храна, а на тој начин Македонија ќе биде испромовирана на најавтентичен начин.

За Мишелин ѕвезда, главниот шеф мора да биде сопственик на ресторанот

Во Република Македонија навистина постојат ресторани со огромен потенцијал, а некои можеби и во овој момент заслужуваат да се најдат на Мишелин водичот, но…,секогаш постои неизбежното „но“по кое доаѓа излитената фраза „за жал“, објасни пред извесно време за нашиот весник д-р Климент Наумов, доцент и раководител на студиските насоки гастрономија и хотелско-ресторански менаџмент при Факултетот за туризам и угостителство-Охрид.

-За жал, нашата држава го изгуби приматот кој го имаше во поранешна Југославија, кога важеше за република со најголемо земјоделско производство. Земјоделието и гастрономијата се тесно поврзани и испреплетени. Не можете да создадете врвен гастрономски производ со низок квалитет на намирници, како што не може да испорачате високо квалитетна ресторанска услуга со несоодветно образован кадар. Македонија моментално е увозно зависна земја во која на две раце може да се избројат географски заштитените производи со ознаки ЗОП и ЗГО (заштитена ознака за потекло; заштитана географска ознака). Друга причина зошто нема ниту еден македонски ресторан на престижната листа, е фактот што голем дел од сопствениците на рестораните, не се истовремено и готвачи. Неоспорлив е фактот, дека не постои ниту еден ресторан во светот, кој се нашол на фамозната Мишелин листа, каде главниот шеф не бил сопственик или сосопственик на истиот – објаснува Наумов.

Што всушност претставува Мишелиновата категоризација?

Големата визија започнала во Клермонт-Феранд (мало гратче во Франција) во 1989 година, кога браќата Андре и Еуард Мишелин го основале нивното светски познато претпријатие за производство на пневматици кога во земјата имало помалку од 3.000 автомобили.

Со цел да им дадат логистичка поддршка на возачите и истите да можат ги планираат и развиваат нивните патувања браќата Мишелин го издаваат малиот црвен водич, наполнет со практични информации за патниците. Целосно новиот Мишелин водич почнал во 1920 гдоина и се продавал за 7 франци. Препознавајќи го растечкото влијание кое го имала ресторанската рубрика на водичот, браќата Мишелин ангажираат тим од мистериозни посетители, или ресторански инспектори, како што се познати денес, анонимно да ги посетуваат и да ги оценуваат рестораните.
Во 1926 година водичот започнал да доделува ѕвезди на ресторациите кои имале префинета кујна, означувајќи ги со една ѕвездичка. Пет години подоцна ја воведуваат градацијата нула, една, две и три ѕвездички, а додека во 1936 година ги објавуваат критериумите според кои ја вршат категоризацијата. Во текот на XX век, благодарение на сериозниот и единствен пристап, Мишелиновите водичи станале бестселери.