На Институтот за судска медицина во Љубљана е завршена обдукцијата на делумни остатоци од човечкото тело кои во март годинава за време на планинарењето во регионот на Кобарида, ги пронашол еден граѓанин. Утврдено е дека се работи за посмртни остатоци на 26-годишен Словак кој на тоа подрачје исчезнал пред повеќе од десет години.

Остатоците на 9 март годинава ги пронашол локален жител кој сам, од долината, по неозначен пат се упатил кон падините. Поради тешко пристапниот планински терен и лошите временски услови, полицајците од Полициската управа Нова Горица извршиле увид два дена подоцна, објавија хрватските медиуми.

Истражниот судија потоа наредил судска обдукција на останките во Институтот за судска медицина во Љубљана и мерки за утврдување и потврдување на идентитетот на починатиот.

„Во продолжението на постапката за идентификација (врз основа на ДНК анализа), несомнено беше утврдено и потврдено дека станува збор за исчезнатиот 26-годишен Мартин Павлус, државјанин на Словачка, кој исчезна на тоа подрачје пред повеќе од десет години, поточно на 8 септември 2012 година. На тој ден, починатиот се спуштал од Матајур кон Кобарид“, соопшти Полициската управа Нова Горица.