Македонскиот филолог, лингвист, синолог и преведувач од старокинески и кинески јазик Игор Радев е гостин во првото издание на поткастот Митови и факти на Слободен печат. Тој неодамна се најде на листата од најистакнати синолози во светот за 2024 година што ја прави Светскиот синолошки центар на Пекиншкиот јазичен универзитет. Радев говори за комплицираната историја и уште покомплицираната сегашност во односите на Кина и Тајван. Тој ќе ви објасни дека е мит сепаратизмот на Тајван и додека Пекинг се откажал од одредени територии на кои Кина историски полага право, Тајпеј ја признава територијата на државата од времето на последната династија Чин.

Односите меѓу Тајван и Кина се премногу комплицирани и потребно е да се разбере генезата на проблемот, која трае од 1911 година. Во поткастот Митови и факти, синологот Радев ја сецира суштината на раздорот меѓу Кина и Тајван, односно како што тој тврди, разликите меѓу Народна Република Кина и Република Кина. Раздорот на најголемите политички партии, Комунистичката и Националистичката, денеска е преточен во жешка точка на геополитиката и можен тригер за глобален судир. Битно е да се знае дека Тајван не е Косово, а Тајванците се всушност Кинези, кои себеси се сметаат за легитимна власт на Република Кина.

Гледајте го целиот поткаст вечерва во 20 часот на Јутјуб каналот на Слободен печат.