Македонскиот пејач Мите Стоилков ќе биде дел од „Џеј трибјут бенд“, кој е основан во чест на познатиот пејач Џеј Рамадановски, пишува српски „Телеграф“.

Инаку, бендот го основал српскиот композитор Александар Радуловиќ Фута, кој ќе ги изведува исклучиво хитовите на легендарниот пејач, кои ги направија тој и неговата сопруга Марина Туцаковиќ.

Членови на бендот се помладата ќерка на Џеј, Марија Рамадановски, најдобриот пријател на Џеј од естрадата цели 25 години, Зоран Јагодиќ Руле, како и македонскиот пејач Мите Стоилков.

– Пред сè, морам да кажам дека е големо задоволство да се биде овде денеска, благодарение на господинот Александар Радуловиќ Фута и на целиот тим. Така што навистина сум изненаден што сум дел од оваа екипа. Сепак, Џеј имаше свој стил, така што ова е голема одговорност. Имам трема и голема одговорност. Но, за мене е голема чест да ги пеам неговите песни на настапите. Едноставно, тој секогаш живее со нас – вели Стоилков.