Мистериозен дефект на подморски телекомуникациски кабел кој ги поврзува Финска и Германија ги нарушил комуникациските услуги, објави денес компанијата која управува со врската. Кабелот Ц-Лион1, кој ги поврзува Хелсинки и Росток во Германија, го поставила Циниа, финска компанија под државна контрола.

Кабелот се протега на речиси 1.200 километри и е единствената директна физичка врска од тој вид меѓу Финска и централна Европа. Минува покрај останати клучни инфраструктурни врски, меѓу кои и гасоводи и енергетски кабли.

Нејасно е што го предизвикало дефектот. Циниа соопшти дека сè уште го истражува проблемот.

Ова се случува само неколку дена откако Вашингтон предупреди дека открил засилена руска воена активност околу клучни подморски кабли. Двајца американски функционери изјавија за „Си-ен-ен“ во септември дека САД сметаат оти сега е поверојатно Русија да изврши потенцијални саботажи на критични делови на инфраструктурата.

Предупредувањето следеше по заедничката истрага на телевизии од Шведска, Данска, Норвешка и Финска, кои во април известија дека Русија има флота потенцијални шпионски бродови кои дејствуваат во нордиските води како дел од програма за можни саботажи на подводни кабли во регионот.