Во Аргентина во текот на минатата недела се регистрирани три смртни случаи од засега непознат вид на пневмонија, чија причина се уште не е позната. Сите починати лица биле хоспитализирани во една клиника во северозападната провинција Тукуман.

Од воспаленија моментално боледуваат вкупно шест лица, од кои пет се медицински работници. Од мистериозна респираторна инфекција починале и двајца здравствени работници и еден пациент, пишува Independent.

Последна жртва е 70-годишна жена која е примена на клиниката на закажана операција. Се верува дека таа била нулти пациент , но тоа се уште не е потврдено.

Причината се уште е под истрага, а властите почнаа со масовно тестирање. Засега е познато само дека симптомите на инфекцијата се слични на коронавирусот и вклучуваат тешка пневмонија, повраќање, висока температура, дијареа и болки во телото.

Од шесте лица кои се заразени, четворица се во тешка состојба и се во болница, а двајца се во домашна изолација.