Значителниот пад на вредноста на норвешката круна стана вест и надвор од Норвешка. Ова е вест и во Германија, чии медиуми објавија дека вредноста на круната е најниска од почетокот на пандемијата на коронавирус, односно во последните четири години. Имено, во изминатите три години круната загуби 25 отсто од вредноста во однос на доларот, а во последните две години загуби 17 отсто од вредноста во однос на еврото. Намалувањето на вредноста на норвешката круна е толку драматично што поранешен министер во оваа земја предложи да се поврзе со еврото, пишува Кликс.ба.

„Драматичното слабеење на круната со текот на времето значи дека треба да размислуваме за нашите опции за иднината“, изјави поранешниот министер за животна средина и парламентарец од опозициската Либерална партија, Свеинунг Ротеватн за „Фајненшл тајмс“ (ФТ).

Но, тој признава дека фиксирањето на курсот има свои недостатоци. Ова е драстично време за круната, која годинава имаше најлоши резултати меѓу десетте најтргувани валути на девизниот пазар. Ова е проблем за оваа нордиска земја, бидејќи увезува многу стоки, а овој увоз е поскап кога еквивалентната вредност за една круна е помала во евра или долари. Поради ова, компаниите се принудени да ги зголемат увозните цени.

„Слабата круна прави сè да биде поскапо, што пак води до високи каматни стапки. На крајот, крајните потрошувачи се големите губитници“, истакна Ротеватн. Повикот на Ротеватн за врзување на круната со еврото доби мала поддршка од другите политички партии. Сепак, имаше позитивна реакција на неговиот предлог да се формира „Комисија за круната“, која ќе се занимава со развојот на оваа валута.