Морнарот на Кралската морнарица за кој било објавено дека е мртов за време на Втората светска војна, го прослави својот 100-ти роденден. Морел Марфи, од Лизбурн, бил на бродот ХМС Капел, кога бил торпедиран од германска подморница во 1944 година.

Четири дена по нападот неговото семејство било информирано дека Марфи бил убиен. Семејството дури добило писмо со сочувство од кралот Џорџ Шести, но набргу потоа Морел тропнал на вратата на семејната куќа.

Тој сега живее во Каунти Даун, а неговата внука Џенифер организирала забава по повод неговиот 100-ти роденден.

„Тешко е да се поверува дека сега имам 100 години. Тешко е да се поверува дека ги преживеав сите овие години, но сепак уживам во животот“, изјави тој за Би-Би-Си.

Морел ѝ се придружил на Кралската морнарица на Денот на Свети Патрик во 1942 година, на 19-годишна возраст, додека беснеела Втората светска војна. Во декември 1944 година тој преживеал германски напад во Ла Манш во кој загинале повеќе од 70 негови колеги, членови на екипажот на ХМС Капел.

Тој бил спасен од американската морнарица и однесен во Франција да се опорави. Нему му кажале дека британската војска го прогласила за мртов.

Кога следниот месец пристигнал ненајавено во домот на неговите родители, тие не верувале дека е тој.

„Имаше солзи радосници кога ја отворија вратата и дознаа дека сум јас. Се сеќавам дека сестра ми трчаше за да им каже на братучедите и на вујко ми и тетка ми дека сум добро“, рече тој.