Европската унија ќе испрати „цивилна мисија” во Ерменија долж границата со Азербејџан со цел „да воспостави доверба” меѓу двете земји и да помогне демаркација на границата. Тоа го изјавија учесниците на четиристран состанок по прашањето одржан синоќа во Прага.

„Мисијата ќе почне во октомври и ќе трае најмногу два месеца. Целта на мисијата е да изгради доверба и преку своите извештаи да им помогне на комисиите за демаркација на границата”, се наведува во заедничката изјава објавена по разговорите меѓу ерменскиот премиер Никол Пашинјан, претседателот на Азербејџан Илхам Алиев, францускиот претседател Емануел Макрон и претседателот на Европскиот совет, Шарл Мишел.

„Азербејџан и Ерменија би можеле да потпишат мировен договор до крајот на годината доколку има добра волја во Ереван”, изјави азербејџанскиот претседател по средбата.