Министерот за одбрана Владо Мисајловски денеска оствари средба со командантот на НАТО мисијата на Косово – КФОР, генерал-мајор Енрико Бардуани. Како што информира Министерството за одбрана, разговорите се фокусираа на значењето на оваа мисија за стабилноста и безбедноста на Косово и поширокиот регион.

„Оваа НАТО мисија е исклучително значајна за уште постабилен и побезбеден регион. Остануваме посветени на нашиот придонес кон КФОР и логистичката поддршка што ја даваме и во иднина“, истакна министерот Мисајловски.

Тој порача дека во услови на геополитички предизвици, стабилен и безбеден регион е приоритет за Македонија, која, како што рече, ќе продолжи да биде „столб на безбедноста на Балканот“.

Имајќи предвид дека мандатот на генерал Бардуани како командант на КФОР завршува наскоро, министерот му се заблагодари за одличната соработка и поддршката на македонскиот контингент.

Генералот Бардуани порача дека македонските војници секојдневно покажуваат врвен професионализам и посветеност на задачите. Тој изрази благодарност за континуираниот придонес на нашата држава во КФОР, нагласувајќи ја важноста на партнерството во одржувањето на мирот и безбедноста во регионот.

Во рамки на посетата, генерал Бардуани се сретна и со началникот на Генералштабот на Армијата, генерал-мајор Сашко Лафчиски.

Македонската Армија учествува во мисијата КФОР од 2020 година.