Приватните дигитални валути како што е „либра“ на Фејсбук нема да може да се користат во Европа сѐ додека не се разјаснат ризиците за нивното користење, објавија денес министрите за финансии на земјите од европскиот блок.

Со ова е потврден нивниот „строг“ став кон дигиталната валута „либра“, која се најде на цел на критиките на глобалните регулаторни центри порадни нејзиното можно влијание врз финансискиот систем од нејзиното претставување во јуни.

Во заедничкото министерско соопштение, се наведува дека ниту една дигитална валута не треба да се користи во ЕУ додека „адекватно не се утврдат и решат правните, регуалторните и контролните предизвици и ризици“.

Прецизирано е дека ваков заклучок се однесува и на таканаречените стабилни дигитални валути кои, како „либрата“, се поддржани со традиционални пари или други хартии од вредност, за разлика од „биткоинот“, кој нема такво осигурување, пренесува „Индикатор.ба“. И „либрата“ и „биткоинот“ спаѓаат се криптовалути.

Министрите на земјите од ЕУ соопштија дека би можеле да го разгледаат регулирањето на сите криптовалути во рамки на еден глобален план.