Министерството за правда за време на надзорите му укажуваше на Основниот суд Куманово за несоодветно архивирање на предметите, но мерки не беа преземени од нивна страна, соопшти денеска Министерстото.

– Комисијата за надзор над функционалноста на АКМИС-системот во судовите при Министерството за правда последниот надзор врз работата на Основниот суд Куманово го изврши на 6 јуни при што беше констатирано дека судската архива е сместена во подрумските простории, архивирањето на предметите било завршено заклучно со 1971 година и нема континуирано архивирање на предмети. Овој проблем се провлекува со децении и е констатиран уште со првиот надзор кога судот бил задолжен да започне со архивирање. Комисијата го задолжи Основниот суд Куманово да започне со континуирано архивирање на предмети и итно расчистување на архивскиот простор. Претседателот на судот беше задолжен да постигне договор со архивот и да се продолжи со натамошно архивирање. За време на надзорот од страна на в.д. претседателот на судот беше истакната забелешка дека овој процес ќе биде тежок за реализација затоа што судот располага само со двајца службеници во архивата – соопшти Министерството за правда.

Комисијата, додаваат од Министерството,  смета дека внатрешната организација е работа на судот, а архивирањето на предметите е обврска која мора да се почитува.

Претседателот на судот Снежана Манев во изјава за „Слободен печат“ рече дека во подрумот на судот биле сместени стари репени предмети од 50-те години од минатиот век до денес, затоа што архивскиот материјал никогаш не бил  предаден и дека тоа е познат факт.

Увидот и истрагата за причините за пожарот ќе почне утре. Објектот се запали ноќта во понеделникот кон вторникот.