Министерката за одбрана Славјанка Петровска денеска на армискиот полигон „Криволак“ ја оствари својата прва средба со новопоставената амабсадорка на САД во Северна Македонија, Анџела Агелер.

Како што истакна министерката Петровска, оваа прва средба се реализира на „Криволак“ затоа што развојот на полигонот е најдобар пример за интензитетот на заедничката соработка, за посветеноста на развојот на одбранбените односи, заедничкиот развој на вооружените сили на двете држави и развојот на интероперабилноста во НАТО. Министерката посочи дека Северна Македонија и САД имаат најсеопфатна и најинтензивна одбранбена соработка, што се должи на посветеноста на двете земји и желбата за заеднички развој.

„Соединетите Американски Држави од 1996 година до денеска го поддржаа нашиот развој со 266 милиони долари, факт кој ја покажува посветеноста на нашиот стратешки партнер кон развојот на армиските капацитети и способности. Денеска, како членка на НАТО овие капацитети и способности се и капацитети на НАТО – Алијансата и се во служба на колективната безбедност“, рече министерката на средбата. Таа дополни дека „Криволак“ е уште еден капацитет кој го развиваме заеднички. Инвестициите на „Криволак“, подвлече Петровска, се инвестиции во посилни сојузнички армии и подобра интероперабилност.

Министерката Петровска додаде дека за земји како Северна Македонија и САД, кои покажуваат силен мотив и посветеност кон стратешкиот дијалог и стратешкото партнерство, амбициите за уште поинтензивна одбранбена соработка се сè поголеми.