Најновиот извештај на Институтот за јавно здравје(ИЈЗ) вели дека во Македонија во периодот од 16 до 22 декември се пријавени 139 случаи на лица заболени од грип, со отскок од скоро 18 отсто во споредба со претходната недела.

Во извештајот објавен утринава, од пријавените случаи, 95 лица се на возраст од 15 до 64 години, 24 се деца помеѓу 5 и 14- годишна возраст, додека пак 12 се на возраст до 4 години и осум пријавени се над 65 години.

Најмногу заболени од грип се регистрирани во Дебар, 42 лица, во Гостивар се пријавени 33 случаи, Куманово брои 22 разболени и во Тетово ИЈЗ евидентирал 15 луѓе заболени од грип.

Во останатите градови кои се наведени во извештајот, бројот на пријавени лица болни од грип изнесува 5 или помалку.

Според ИЈЗ, вирусната активност на грипот е сезонска и ниска во Гостивар, додека во Дебар е забележана средна активност на вирусот.

Споредбено со овој период претходната година, бројот на лица заболени од грип е намален за 10 отсто и изнесува 799.

Заклулно со оваа седмица, во Македонија со комерцијална вакцина против грип се вакцинирани 72.125 лица, велат од ИЈЗ.