Пратеникот од ВМРО-ДПМНЕ, Антонио Милошоски вели дека неодамнешното однесување на бугарските парламентарци во Европскиот парламент на еден начин претставува отрезнување за оние коишто сметаат дека Бугарија не бара ништо освен мало корегирање на Уставот.

„Менувањето на Уставот за Бугарија е само отварање на вратата низ која тие имаат намера да протнат уште десетина такви тешки барања“, истакна Милошоски на телевизија Алфа во емисијата „За или против“ .

Милошоски посочи дека каков и да биде исходот, сето тоа што се случувало во Комисијата за надворешни работи на Европскиот парламент треба да се смета за успех, затоа што веќе сите знаат дека Македонија кредибилно тврдеше дека менувањето на преамбулата не е единствено барање од страна на Бугарија.

„Дури и да се случи во Европскиот парламент да има и пресврт и извештајот да не помине заради противењето на бугарските европратеници тогаш барем ќе бидеме на јасно за што станува збор, дека не станува збор за реформи во здравство, во образование туку станува збор за менување или одново пишување на историските читанки во изминативе 150 години“, рече Милошоски.