Пратеникот од ВМРО-ДПМНЕ Антонијо Милошоски вечерва во гостување на „Алсат“ изјави дека трагедијата во Кочани не треба да се разгледува само според последиците, туку и според причините, посочувајќи на системската корупција како клучен фактор. Тој ја поздрави „проактивноста на истражните органи“ и рече дека истрагата се разликува од истрагите за претходни случаи како оној со „Беса Транс“.

Во врска со иницијативата на ДУИ за Анкетна комисија, Милошоски рече дека таа „не добила доволна поддршка“.

Тој ги коментираше актуелните превирања во коалицијата „Вреди“ и рече дека стабилноста на Владата не е загрозена, и покрај „одредени тензии“ кај партнерите.

„Прво, не сме задоволни што има вакви турбуленции во коалицијата „Вреди“, ние би биле многу посреќни ако тие успеат да ја задржат својата политичка компактност. Бидејќи, таа политичка компактност беше еден силен адут за да ја добиеме заеднички довербата од гласачите, а таа доверба беше, ново парламентарно мнозинство да раководи со државата и да ги поправи грешките на СДС и на ДУИ, којшто добија порака дека треба да бидат во опозиција. Истовремено, не можеме на ниеден политички субјект да му сугерираме како размислува да настапи или да не настапи на локалните избори“, рече Милошоски.