Бројот на потенцијални жртви на модерното ропство во Британија минатата година достигна рекордно високо ниво, покажа официјалната статистика, со предупредувања дека криминалот е во пораст, пишува „Индепендент“.

Податоците од Министерството за внатрешни работи покажуваат дека во 2024 година имало 19.125 упатувања на потенцијални жртви до Националниот механизам за упатување (НРМ) – системот за идентификација и заштита на жртвите во ОК, што го надминува рекордот од 2023 година од околу 17.000.

Модерното ропство, кое може да вклучува трговија со луѓе, ропство или принудна работа, расте низ целиот свет поради мешавината на сиромаштија, конфликти и миграција, што влијае на милиони луѓе.

Криминалот има многу форми во Британија, каде што мажите, жените и децата можат да бидат принудени на експлоататорска работа во трговијата со дрога или секс, перални за автомобили, салони за убавина, приватни домови или во секторот за социјална грижа.

Вистинскиот број на луѓе кои живеат како модерни робови во Британија е околу 130.000, според организацијата за човекови права Anti-Slavery International.

Околу 23 отсто од луѓето кои живеат во вакви услови се британски државјани, додека Албанците се втора најчесто упатувана националност со 13 отсто, а по нив се Виетнамците со 11 отсто. Околу 31 отсто или речиси 6.000 од упатените во системот НРМ биле деца.

Добротворните организации и активисти ја повикаа Британија да го промени својот пристап во борбата против модерното ропство со обезбедување посилно спроведување на законите за работни односи и реформирање на имиграциската политика, која е фокусирана на запирање на илегалната миграција.

Заострените политики за имиграција оставаат илјадници луѓе заробени во модерно ропство и со помала веројатност да се појават поради страв од депортација, објави „Ројтерс“ минатиот месец.