Најдобрата македонска фудбалска репрезентација в сабота од 15.00 часот во Вадуц ќе го игра првиот натпревар од квалификациите за Светското првенство 2026 година против Лихтенштајн.

Пред натпреварот нашиот селектор Благоја Милевски зборуваше на прес-конференција, а првите прашања беа за големата трагедија што се случи во Кочани во која животот го загубија 59 лица.

– Сѐ уште ми е тешко да зборувам за тоа. Уште еднаш да изразиме сочувство до семејствата на сите починати. Мислам дека нашата концентрација треба да биде на фудбалска прашања. Многу е тежок моментот за било што да се зборува понатака и повеќе – изјави Милевски.

Селекторот вели дека Македонија максимално го почитува Лихтенштајн, но и воедно очекува неговите играчи да имаат сериозно максимален пристап на овој дуел.

– Што се однесува до поставеноста и играта на ривалот, секако дека не мора да значи дека ќе биде истата и на утрешниот меч, но од друга страна, имаме максимален респект кон нашиот противник и мислам дека ќе имаме и максимален сериозен пристап на утрешниот меч – вели Милевски.

Последен пат овие две репрезентации се сретнаа на 8 октомври 2021 година во мундијалски квалификации кога на гости бевме подобри со 4:0.

– Секако дека тука сме дојдени и максимално подготвени за утрешниот натпревар. Секако дека би било добро да стартуваме со победа во овие квалификации, да се продолжи таа серија на добри резултати, седми натпревар по ред, но може да се надеваме на такво нешто само ако бидеме на нашиот максимум – се зборовите на Милевски.