Грчкиот премиер Кирјакос Мицотакис на прес-конференцијата во Вашингтон по завршувањето на НАТО Самитот  ги повтори позициите на Владата дека е неопходно целосно почитување на Договорот од Преспа и клучна е употребата на уставното име и во внатрешноста на земјата.

– Грција во овој момент нема да ги открие оружјата што ѝ се на располагање за да одговори на евентуалното инсистирање на раководството на соседната земја на оваа тактика – рече грчкиот премиер.

Мицотакис посочи дека имал можност да ги информира неговите колеги за „фактот што премиерот на Северна Македонија избра да не применува клучен член од Договорот во однос на единственото име на соседната земја за севкупна употреба и да ја нарекува својата земја „Република Македонија“ во внатрешноста, нешто што очигледно јасно се забранува со Договорот“.

Паралелно, потенцираше дека за време на состанокот и во присуство на сите лидери на НАТО, Мицкоски „не ја следеше оваа тактика и го користеше уставното име на неговата земја“.

– Сметам дека на еден или на друг начин власта на соседната земја ќе сфати дека оваа тактика е целосно контрапродуктивна. Договорите мора да се почитуваат. Тоа е нешто што го нагласив вчера на пленумот на НАТО и тоа е нешто што мислам дека го разбираат и сите наши сојузници. Ние сакаме Северна Македонија да направи чекори кон европски пристап. Но, за ова предуслов е почитувањето на меѓународното право и почитувањето на договорите што земјата ги има потпишано. Верувам дека на еден или на друг начин, ова е нешто што раководството на Скопје ќе го сфати – рече Мицотакис.

Двајцата премиери и покрај тоа што не беше исклучена варијантата да се сретнат на маргините на Самитот на НАТО во Вашингтон, по изјавата на Мицкоски пред новинарите кога употреби „Македонија“ стана јасно дека средбата нема да се случи.