Потребата од забрзување на процесот за интеграции и заедничко разбирање да се одблокира нашиот пат кон ЕУ, биле главните теми на денешната средба помеѓу премиерот Христијан Мицкоски и заменик претседателката на Европската комисија, Каја Калас, во рамки на Самитот ЕУ-Западен Балкан.

-Во Брисел имав средба со заменик Претседателката на Европската комисија и висок претставник за надворешни работи и безбедносна политика, Каја Калас. На средбата разговаравме од потребата ЕУ да го забрза процесот за интеграции и да направи заложба низ добра волја и заедничко разбирање да се одблокира нашиот пат кон ЕУ. Ги објаснив нашите позиции и нашите цели. Македонија заслужува да оди напред во интеграциите – објави Мицкоски.

Како што најави Владата, покрај учеството на Самитот, премиерот Мицкоски ќе има средби и со претседателката на Европската комисија, Урсула фон дер Лајен и со неговите колеги од Шпанија и Полска, Педро Санчез и Доналд Туск.

Мицкоски утре ќе учествува и на Самитот на Европската народна партија (ЕПП), кој ќе се одржи пред средбата на шефовите на држави или влади на членките на ЕУ.

Во пресрет на посетата на Брисел, премиерот Мицкоски во саботата изјави дека пораките кои доаѓаат од таму „не се баш така јасни“, но дека нашата порака е јасна дека ние доволно направивме како ниту една држава во ЕУ.