Како Влада не сме задоволни од образованието, особено од високото образование, рече премиерот Христијан Мицкоски одговарајќи на новинарско прашање за тоа какво образование имаме.

– Ако пред 10-15 години зборувавме за компјутер за секое дете, сега по 7 години голгота стигнавме до тоа учениците барем да ги имаат учебниците пред себе. Ќе ве потсетам дека на почетокот на мандатот на ова влада беше поништена една, би рекол, сомнителна одлука за формирање на еден отсек, на еден универзитет, поврзан со многу сомнежи во минатото. Поништиме и акредитации на два приватни институти – рече премиерот.

Тој рече дека се направени вонредни инспекциски надзори во неколку универзитети – во Климент Охридски, Апостол Павле, Државниот универзитет во Тетово … Според него, веќе е добиена јасна слика за состојбата на универзитетите.

– Буџетот за образование ќе биде зголемен од 30 на 40 милијарди денари. Постигнат е историски договор со Синдикатот за зголемување на платите во наредните 4 години. Ќе се екипираат и одборите за акредитација и евалуација. Преземаме мерки за да има образование какво што заслужуваат граѓаните – рече Мицкоски на денешното отворање на административен центар за граѓаните во Аеродром.