„Не очекував дека свечената Светосавска академија ќе ја злоупотреби за испраќање такви пораки“, рече денеска на прес-конференција премиерот Христијан Мицкоски одговарајќи на новинарско прашање како го оценува синоќешниот говор на претседателот на Република Српска, Милорад Додик, кој на настанот во Скопје организиран по повод празникот на српската заедница во државава – Свети Сава, испрати анти-ЕУ и анти-НАТО пораки и го негираше геноцидот во Сребреница.

На сето ова сведочеа премиерот Христијан Мицкоски, повеќе државни функционери, како и лидерот на опозицискиот СДСМ, Венко Филипче.

„Да живее Македонија, да живее Србија, да живее Република Српска и да живее братска Русија“ – вака лидерот на босанските Срби, Милорад Додик, синоќа го заврши својот говор во Македонскиот народен театар, на свечената академија по повод српскиот национален празник, денот посветен на Свети Сава.

Додик го пофали рускиот претседател Путин, рече дека „Србите денес на Балканот имаат две држави – Србија и Република Српска“, а потоа и дека „лажеле“ оние кои го прогласиле геноцидот во Сребреница. Тој испрати и пораки против НАТО и против ЕУ.

„Што остана од Европа? Некоја вредност? Кои вредности? Каде се тие?, рече Додик.

„Апсолутно не се согласувам и навистина не очекував дека тој настан ќе го злоупотреби со испраќање вакви пораки, бидејќи сепак тоа беше свечена академија, а не место каде се испраќаат вакви политички пораки“, рече денеска Мицкоски.

Реагираа од ДУИ, како и од СДА – партијата на Бошњаците во земјава.

На Светосавската академија, гостите ги пречека министерот за односи меѓу заедниците Иван Стоилковиќ, а присутни беа и поглаварите на Македонската и Српската православна црква, архиепископот Стефан и патријархот Порфириј.

Додик од Скопје: Србите денес на Балканот имаат две држави – Србија и Република Српска