До крајот на јули треба да биде дефиниран моделот со кој Владата ќе реагира на зголемувањето на цените на прехранбените производи, најави денеска премиерот Христијан Мицкоски.

На заедничката прес-конференција со министерот за локална самоуправа Златко Перински, Мицкоски истакна дека се прават детални анализи и дека се размислува за неколку пристапи, во консултација со економски експерти, Пазарниот инспекторат и трговските синџири.

– Очекувам до крајот на месецов да го конципираме моделот и, доколку трендот продолжи и во месеците што следат, да донесеме соодветни мерки. Сакаме заеднички, а не како различни страни, да пристапиме кон проблемот и да најдеме трајно решение – рече Мицкоски.

Тој додаде дека Владата е насочена кон утврдување на причините за растот на базичната инфлација, која, според него, има најголемо влијание врз крајните цени на производите.

– Ќе направиме сè што е во наша моќ граѓаните да имаат најниски можни цени, но мораме да влеземе длабински во анализата на базичната инфлација. Не сакаме краткорочни и стихийни мерки, туку таргетирани и ефикасни – рече премиерот.

Податоците на Државниот завод за статистика покажуваат дека трошоците на живот во јуни се зголемени за 4,5 проценти на годишно ниво, а цените на мало за 3,7 проценти.

Мицкоски веќе претходно, на 7 јули, најави анализа на структурата на инфлацијата, посочувајќи дека дел од ценовниот раст не доаѓа само од трговците, туку и од пошироки економски фактори, вклучително и инфлацијата на услуги.

Нема ни трпение, а ни спасение од цените – Ќе јадеме ли повторно бурек поевтин за 5 денари?