Не сакам ни да размислувам дека комисија формирана од Владата ќе ги проверува податоците од пописот. Ако се формира таква комисија, пописот од статистичка ќе стане политичка операција, или тоа би било јас како економист да проверувам дали хирург квалитетно оперирал. Тоа во најмала рака е смешно, вели за „Слободен печат“ Апостол Симовски, директор на Државниот завод за статистика (ДЗС), за предлогот на пратеникот Павле Трајанов за измени на Законот за попис.

Трајанов најави дека до Собранието ќе предложи информација за пописот со заклучоци да се изостават нерезидентните од вкупното население, да се комплетираат податоците за 132.000 непопишани во делот на етничката, јазичната и верската припадност, а деветчлена експертска комисија, формирана од Владата, во соработка со ДЗС да ги провери податоците.

– Ако се формира таква комисија, пописот од статистичка ќе стане политичка операција, бидејќи тоа би било политичко тело што го формира Владата. Воопшто не сакаме ни да размислуваме во таа насока. Поминавме долга процедура при носењето на Законот сакајќи да избегнеме такво нешто. Знаете дека во 2011 година пописот го спроведуваше Државна пописна комисија, пописно тело формирано од Владата и знаеме како излезе резултатот од тој попис – вели Симовски.

Тој додава дека Законот за заштита на лични податоци не дозволува владино тело или кој било друг да проверува податоци што се лични и кои служат само и исклучиво за статистички цели.

– Ќе настане мешање во стручноста. Имаме редовна постапка на два типа ревизија, едната е за финансиско-материјалното работење врзано со пописот, а втората ревизија е за заштита на личните податоци којашто ја врши овластената Агенција за заштита на личните податоци. Ревизија од политичари нема да дозволиме во никој случај. Нека менуваат закони, нека пробуваат, но ќе прекршат многу други работи – вели Симовски.

Тој е дециден дека не може политички парти да оценуваат дали пописот е успешен или не.

– Пописот е статистичка операција и успешноста на пописот зависи од тоа колку и како се почитувале правилата на игра, односно стандардите што се воспоставени со методологијата. Тоа го тврдиме, а потврда добивме и од Европската комисија, односно од Евростат, дека е испочитувано до последен дел. Не може и не смее да дозволиме политичка структура да врши проверка на стручноста. Тоа е исто како јас, кој сум економист по образование, да вршам проверка на стручноста на некој хирург, да проверам дали тој добро и квалитетно ги врши операциите за кои учел не знам колку години, а јас да го проверувам оти Владата ме овластила. Да не бидам груб и вулгарен, но мислам дека е смешно – вели директорот на ДЗС.

За најавите дека е можно да заработи кривична за пописот, Симовски вели дека е тука и дека никаде не бега. Тој вели дека има институции и дека може кој сака да тужи ако смета дека треба да го повика на одговорност. Според него, невозможно е и да се изостават нерезидентните лица од вкупното население.

– Како да го изоставиме нерезидентното население од вкупното и што да правиме? Тоа значи дека немаме целосен попис. Едно е неопфатено со белези население, а земени се белезите од регистри, населението е вклучено, тоа не е изоставено од пописот. Имаме податоци за нив, но немаме четири белези, кои не се клучни за пописот. Опфатот е целосен. Има земји што прават пописи исклучиво од регистри, да ги поништат ли пописите бидејќи некој не е попишан? Ниеден човек не е попишан на нив и што правиме таму? – прашува Симовски.

СДСМ и ДУИ молчат за иницијативата на Трајанов

Иако побаравме, не добивме одговори од владејачките СДСМ и ДУИ дали иницијативата на коалицискиот партнер Трајанов за измени на Законот за попис е прифатлива.

Позицијата на ВМРО-ДПМНЕ е „ни риба ни девојка“, односно не прецизираат дали би го поддржале предлогот на Трајанов. Од партијата велат дека при носењето на Законот имале амандмани со кои барале нерезидентното население да не влезе во вкупно попишаните, како и методологијата на попишување да биде составен дел од Законот, а не како сега – да е уредена со подзаконски акт, но дека тогаш нивните предлози мнозинството ги одбило.

– Пописот е спроведен, бројките се тие, остануваме на ставот дека пописот е некомплетен – велат од ВМРО-ДПМНЕ.