Онкологогот Мери Пешевска која е една од обвинетите во случајот „Онкологија“ за несовесно лекување, не дошла на денешното рочиште затоа што имала стомачен вирус со температура и повраќање и затоа не дошла на почетокот на судењето за овој случај.

Нејзиниот адвокат Јовица Страшевски тврди дека тројцата доктори се селективно одбрани да бидат обвинети, затоа што поранешниот директор Нино Васев ги користел логовите и печатите на сите лекари од оваа клиника.

– Мене ми е нејасно како обвинителството има поднесено обвинение против мојот клиент. Од сите работи кои ги доставивме до обвинителството не произлегува ниту еден доказ дека второобвинетата Мери има направено пропуст, односно несовесно лекување. Мислам дека единствено нешто што е користено од страна на поранешниот директор Васев е што користел логови и печати не само на Мери туку и на разни лекари. Нејасно е зошто од цела клинка се одбрани тројца доктори да бидат обвинети. Истата постапка била за сите доктори од страна на директорот. Лекарите се одбрани селективно, несовесно лекување нема, злоупотребен е нивниот печат и лог – рече Страшевски.

Според него, тврдењето на Обвинителството дека не мора да биде лиценциран вештакот што го прави вештачењето е навистина неодговорно и тоа законски во нашата држава не е дозволено.

– Тоа вештачење има низа пропусти и самиот вештак што вештачел ги нема сите податоци од пациентите. Што се однесува за другите вештачења треба ги немаме видено, денеска ни ги доставија. Можам да потврдам за Мери дека во текот на целиот распит во обвинителството и како осомничени и како обвинета доставиме стотици страни на протоколи на извештаи, вештачења на пациенти за што се давани одредени лекови како се дозира по доза – рече Страшевски.