Германскиот канцелар Фридрих Мерц денес изјави дека од почетокот на војната меѓу Израел и Хамас во 2023 година, антисемитизмот станал погласен, поотворен, побезобразен и понасилен.

„Критиката кон Израел и најгрубото менување на улогите меѓу сторителот и жртвата е сè повеќе изговор за ширење на отровот на антисемитизмот“, рече Мерц на 75-годишнината од основањето на Централниот совет на Евреите во Германија, пренесува Ројтерс.

Минатиот месец, Германија го суспендираше извозот на оружје за кое верува дека може да се користи во Појасот Газа, што е прв пат Берлин да ја повлече воената помош за Израел.

Оваа одлука е донесена поради зголемениот јавен притисок и хуманитарната криза во Газа.

Германија е најголемиот снабдувач со оружје на Израел по САД и долго време е еден од најголемите поддржувачи на Израел, првенствено поради нејзината историска одговорност за Холокаустот за време на Втората светска војна.