Премиерот Христијан Мицкоски засега не открива за кого го чува заменик-министерското столче во Министерството за одбрана, додека висок функционер од Вреди за „Слободен печат“ брифира дека начелно е договорено нов владин партнер да биде ДПА на Мендух Тачи. Тачи, пак, не одговара дали откако го напушти Европскиот фронт предводен од Али Ахмети и дејствува како независен, сега ќе се пресели во власта. Од Владата само кусо велат дека засега нема договор и дека ќе известат кога ќе има нешто ново.

„Слободен печат“ веќе објави дека во заменик-министерското столче за одбрана можно е да седне кадар од помалите партии во Фронтот, откако Елфете Исмаили поднесе оставка и реши да го следи лидерот на дел од Алијанса за Албанците, Арбен Таравари, и да ја напушти Владата. Ако се формализира договорот со Тачи за влез во Владата, тоа ќе значи дека мнозинството ќе добие еден пратеник повеќе.

Дека власта игра на картата на ситнење на Европскиот фронт, потврда е и тоа дека премиерот Мицкоски до Собранието уште не го доставил предлогот за нов заменик-министер за одбрана, иако вчера пратениците ги изгласаа новиот министер за здравство Азир Алиу, кој доаѓа на местото на Таравари, како и заменикот во ресорот земјоделие Албрим Хоџа. Премиерот не откри кога ќе достави предлог за заменикот во Министерството за одбрана.

– За заменикот бидете трпеливи, многу скоро ќе биде познат – изјави Мицкоски.

Изборот на Алиу и на Хоџа, кои доаѓаат од фракцијата на Алијанса за Албанците предводена од вицепремиерот Арбен Фетаи, дополнително го продлабочи расколот во АА меѓу довчерашните сопартијци. По собраниската седница за избор на министерот за здравство, Таравари објави видео насловено „Како беа продадени и колку чинеа“, обвинувајќи ги Фетаи и Алиу дека се продале за функции. Фетаи, пак, преку отворено писмо до Таравари, видеото го оцени за „гебелсовска пропаганда“ и го потсети екслидерот дека е меѓу најдоброситуираните министри.

„Драг имењак Арбен, со болка и чудење ја гледам гебелсовската пропаганда и одвратните обвинувања што ги упативте против мене. Смешно е да се каже дека сум продаден за плата од 1.890 евра, износ што не е ни блиску до десетина од приходите што ги оставив зад себе за да се вратам тука. Добро знаете дека сум финансиски обезбеден – официјално најобезбедениот министер од сите, според нашите јавни пријави на имотот – и дека сè сум направил со чесна работа, секогаш во приватниот сектор, никогаш во јавниот. Јас, имењак, одговарам за секој цент, ама баш за секој цент, пред народот, активистите, граѓаните и пред државните институции. Во политиката, малкумина можат да се пофалат со тоа. Добро знаеш дека не се вратив за пари и дека не сум мотивиран од алчност. Се вратив затоа што самиот ми рече: „Ајде, брате, да го затвориме поглавјето ДУИ до локалните избори“. Верувај ми. И дојдов, дојдов затоа што ти верував – напиша, меѓу другото, Фетаи во отвореното писмо до Таравари и му порача дека повеќе не го препознава зашто тој се приклонил кон ДУИ и се обидел да ја стави Алијансата во скутот на историскиот противник.

Таравари го обвини и новиот министер за здравство и довчерашен сопартиец Алиу дека тој како министер во владата на Димитар Ковачевски предложил укинување на „балансерот“.

По излегувањето на Таравари од Владата, Вреди од некогашните 14, сега има 11 пратеници. Ако на власта ѝ се приклучи ДПА, тогаш ќе бројат 12 пратеници. Наскоро ќе биде појасно дали ќе им се придружат и нови пратеници од Фронтот за да се оствари најавата на вицепремиерот Изет Меџити дека пратеничката група ќе брои повеќе од 14 народни избраници. Алијанса на Таравари, пак, од пет пратеници и пратеничка група се сведе на тројца.

Азир Алиу е предлогот за нов министер за здравство, Арбен Фетаи влегува во претседателството на „Вреди“