Во својот втор натпревар оваа сезона во ЕХФ Европската лига, ракометниот клуб Вардар 1961 загуби убедливо на гости од Мелсунген со 34:18. Германскиот претставник уште еднаш докажа зошто е еден од главните фаворити за пехарот во ова натпреварување.

Скопските „црвено-црни“ успеаја единствено на стартот да израмнат на 1:1, а потоа домаќинот направи серија од 4:0 што беше најава за високата победа. Играчите на Владо Недановски се доближија на „минус два“ (5:3), но повторно се дозволи ривалот да направи нова низа на погодоци за високи 9:3 на семафорот.

Мелсунген одржуваше позитива од четири-пет голови разлика сѐ до моментот кога повторно Вардар за момент ги враќа своите шанси на овој натпревар откако дојде на само „минус два“ (11:9) и наместо да се одржува ваквата резултатска неизвеност, германската екипа имаше нов силен налет до паузата со серија од 6:1 за 17:10 по првото полувреме.

Во вториот дел Вардар не можеше ништо повеќе да направи, делуваше немоќно на теренот, доминираше Мелсунген кој за прв пат на овој дуел дојде и до двоцифрено водство (20:10), а нешто подоцна зголеми и на 25:12 и 27:13. Најголемата предност на Германците изнесуваше „плус 16“ (30:14), и финишот беше само рутина.

Српскиот интернационалец Крсманчиќ беше најефикасен во редовите на Вардар со четири голови, а по три имаа македонскиот репрезентативец Милан Лазаревски и Тунижанецот Ашраф Маргели.

Во рамките од третото коло Вардар на 22 октомври во СЦ „Јане Сандански“ – Скопје ќе го пречека Порто од Португалија.