Мексиканскиот претседател Андрес Мануел Лопез Обрадор изјави дека неговата администрација нема да воведува санкции против Русија поради нејзината инвазија на Украина, јави Ројтерс.

„Сакаме да останеме неутрални“, рече Лопез Обрадор, повикувајќи на дијалог.

Отворен камп со украински бегалци кај Мексико Сити

Стотици украински бегалци отворија камп кај Мексико Сити и чекаат дозвола од владата на САД за влез во земјата, јавија американските медиуми.

Во кампот во големи шатори поставен во правливо поле недалеку од мексиканската престолнина се наоѓаат околу 500 луѓе. Кампот е отворен пред една недела и таму секојдневно доаѓаат од 50 до 100 лица.

Некои веќе дошле до пограничната зона кај Тихуана, каде им кажале дека повеќе нема да примаат бегалци. Многумина пристигаат со летови од аеродромите во Мексико Сити или Канкун.

Владата на САД кон крајот на март вети дека ќе прифати 100 илјади украински бегалци.

Стотици Украинци доаѓаат од Европа во Мексико секојдневно како туристи, и преку аеродромите во Мексико Сити или Канкун и заминуваат во Тихуана, каде неколку денови чекаат да добијат хуманитарна дозвола за влез во САД на граничниот премин Сан Диего.