Ланецот ресторани за брза храна „Мекдоналдс“ денеска објави дека ќе потроши 100 милиони долари за да ја зголеми продажбата откако појавата на бактеријата ешерихија коли во неговите производи ги исплаши купувачите и предизвика пад на бизнисот на компанијата во САД.

Американскиот ланец објави дека контроверзните хамбургери од „четврт фунта“ сега се враќаат на менијата низ целата земја и дека компанијата ги инвестира споменатите пари во маркетинг и други програми за да ја врати довербата на клиентите, објави Блумберг.

Продажбата на Мекдоналдс опадна откако американскиот Центар за контрола и превенција на болести (ЦДЦ) во октомври објави дека истражува појава на контаминација на храната со ешерихија коли, за која се верува дека е предизвикана од свеж исечен кромид во спорниот сендвич.