Вицепремиерот Изет Меџити во емисијата „Дијалог во Лајм“ рече дека темата за промена на државниот грб не била дел од договорот за владината коалиција со ВМРО-ДПМНЕ и дека таа тема за Владата не е приоритетна.

Сепак, Меџити рече дека коалицијата „Вреди“ е подготвена да разговара за сите теми и доколку се отвори темата за промена на грбот, како симбол од комунизмот, тогаш и химната „треба да се прилагоди на новото време“.

„Начелно сме разговарале за прашањето за грбот и за химната. Ако грбот е комунистички реликт, тогаш и химната доаѓа од комунистичкиот период, тогаш химната треба да ја прилагодиме на новото време, на модерното време со европски дух. Може да биде химна само со музика и без текст, или текстот може да биде поприфатен. Рековме, ако ги отвориме овие теми, да ги отвараме во пакети, каде што терминот 20 отсто треба да се замени со албанскиот јазик“, рече Меџити.