На партијата на Изет Меџити, односно Демократското движење, денеска и се приклучија целокупни структури на Демократската унија за интеграција од Сарај, се пофали тој на Фејсбук објавувајќи и фотографија од новите членови од редовите на ДУИ.

Меѓу личностите кои му се придружиле  на Изет Меџити се голем број носители на политичкото делување на ДУИ во огранокот Сарај.

-Мухамед Рама, претседател на подогранокот Радуше, поранешен претседател на Советот на Општина Сарај, актуелен општински советник, Зухејр Реџепи, член на огранокот на Сарај од Горно Свиларе, Насер Мухареми, поранешен претседател на подогранокот на Долно Свиларе, основач на ДУИ и поранешен борец, додека сличен чекор има и поранешниот портпарол на Огранокот на ДУИ во Сарај, познатиот новинар Африм Таналари, напиша Меџити.

Тој додава и други имиња од раководството на ДУИ кои се приклучиле на Демократското движење.

-Селајдин Белули, член на подогранокот Сарај од формирањето на ДУИ, Мухамед Елмази, претседател на подогранокот Сарај и член на Генералниот совет на ДУИ, а во моментов советник во Град Скопје, Арсим Рустеми, член на огранокот во Сарај од подогранокот од Арнаќија и Ајрула Мустафа, член на огранок Сарај од подогранок Семениште. Голем интерес искажа уште еден голем дел од структурата на ДУИ, од кои се очекува многу брзо да се приклучат на идејата за големата промена и борбата против корупцијата и индивидуалните интереси, напиша Меџити.

Исто така Демократското движење под објавата насловена: „Чесното патување продолжува“ соопштува дека за координатор на Демократското движење за огранокот во Сарај го назначува Мухамед Елмази, советник во Град Скопје, економист и докажан политички активист, додека Мухамед Рама е именуван за заменик координатор, Претседател на Советот на Општина Сарај, магистер по политички науки и истакнат политички активист.