„Времето на балансерот е завршено, неговиот механизам е девалвиран“, изјави првиот вицепремиер Изет Меџити за ТВ 21 и најави дека вработувањата на Албанци нема да престане, но ќе се прави „врз база на квалитет, а не на партиите“.

„За волја на вистината, во првите години по војната од 2001 година, балансерот даде ефективни резултати во квантитативната застапеност на Албанците, но не и во последните четири или 8 години. Во бројни случаи беше девалвиран и даваше спротивен ефект“, рече Меџити во гостување на ТВ21 запрашан за неговиот став по одлуката на Уставниот суд.

Тој рече дека овој механизам ќе се унапреди во закон, за што имало политички договор меѓу ВМРО-ДПМНЕ и коалицијата „Вреди“.

„Прво, во овој период таму каде што ќе има вработувања, ќе има вработувања и на Албанци. Второ, Албанците не губат со укинувањето на балансерот, иако Уставниот суд не го нашол моментот за тоа, не чекал да го унапредиме, но Албанците ќе добијат повеќе затоа што ќе донесеме закон за соодветно претставување кој не само што ќе го гарантира претставувањето на Албанците во јавната и државната администрација, туку ќе гарантира и непартиски и квалитативни вработувања. Ќе биде избран Албанец, но ќе биде избран најобразованиот и најподготвениот Албанец, бидејќи на овој начин утре ќе имаме администратор кој подобро ќе му служи на граѓанинот“, рече Меџити.