Таа фарса се заканува да прерасне во најголема катастрофа во кралското семејство од 1997 година и начинот на кој семејството се однесувало по смртта на Дајана, пренесува Блумберг.

Британскиот принц Ендрју вчера прв пат во интервју за Би-Би-Си одговарал на прашања за врските со осудениот педофил Епстајн, во кое признал дека било грешка што престојувал во неговата куќа.

Принцот Ендрју во едно од ретките интервјуа вчера за Би-Би-Си категорички ги отфрлил наводите дека имал сексуален однос со Американката Вирџинија Робертс, која го обвинила за сексуално злоупотребување во времето кога била малолетна.

Таа тврди дека тоа се случило три пати во 2001 и 2002 година, кога имала 17 години во Лондон, Њујорк и на приватниот остров на Епстајн на Девствените острови.

Повеќечасовното интервју веднаш станало ударна тема на социјалните мрежи. Реакции имало премногу, но малку му оделе во прилог на принцот.

Многу медиуми и аналитичари оцениле дека тој дури и не во состојба да излаже како што треба. Одговорите кои принцот ги давал сигурно уште долго ќе предизвикуваат осуди, а посебно оној дека четири дена престојувал во вилата на Епстајн во 2010-та година, затоа што му било „многу комфортно”.

Посетата за која станува збор уследила неколку месеци откако Епстајн бил ослободен од домашен притвор во кој се наоѓал поради злоупотребување на малолетнички.

Марк Стивенс, медиумски експерт, рекол дека интервјуто претставувало катастрофална грешка и додал дека таквата стратегија има смисла само ако имате целосен и јасен и одговор на секое прашање, а во интервјуто Ендрју имал многу несигурни и климави одговори.

Принцот Ендрју веќе со месеци е под притисок поради врските со Епстајн, 66-годишниот американски милијардер, кој откако бил обвинет за сексуално злоупотребување на малолетнички во подолг период извршил самоубиство во август во затвор во Њујорк.