Медицинските сестри од Клиничката болница Тетово кои протестираа поради тоа што работат со договор за дело, денеска објавија дека го ставаат протестот во мирување поради слаба поддршка од институциите и граѓаните. Ќе го чекаат назначувањето на новиот министер за здравство Азир Алиу кое ќе се случи најверојатно на 12 јуни, но можно е и порано ако Собранието го стави на дневен ред неговото назначување пред тој период. Медицинските сестри од тетовската клиничка болница не се откажуваат од барањата.

-Проблемот не е во конкретен директор туку оваа состојба се провлекува со секоја промена на раководството. И покрај посветеноста за време на ковид-пандемијата не добивме подобри услови. Одлучивме да се повлечеме достоинствено, но нема да престанеме да ги бараме нашите права. Ќе продолжиме да чекаме одговор од болницата од Министерството за здравство и од Министерството за финансии, изјави Лидија Коруновски, главна медицинска сестра во Клиничка болница Тетово.