Темата за згуснатиот фудбалски календар повторно е актуелна, а сега зборуваше францускиот голгетер и член на Реал Мадрид, Килијан Мбапе.

Мбапе отворено изрази незадоволство порачувајќи дека не можат да играат 60 натпревари во една сезона.

„Не знам дали навистина сме подготвени да играме по 60 натпревари во една сезона. Искрено, не се сеќавам да сум видел некој фудбалер кој може на толку натпревари да ги даде своите најдобри перформанси, едноставно не се издржува и потребен ни е одмор“; изјави Мбапе.

Во последно време сè повеќе фудбалери, тренери и спортски директори јавно укажуваат на проблемот со згуснатиот календар со натпревари речиси секој трет ден, на повеќе фронтови: лига, купови, европски натпреварувања, репрезентации…

Сепак, паралелно со оваа критика, јавноста често потсетува на една друга страна на приказната, високите плати кои ги заработуваат фудбалерите, кои достигнуваат астрономски суми и постојано растат. Тоа отвора дилеми и контра-реакции, особено кај навивачите кои се прашуваат: колку одмор е доволно кога годишната плата се мери во милиони?