Директорката на ЈП „Комунална хигиена“ Косана Мазнева денеска ги обвини советниците во Советот на Град Скопје дека поради тоа што не ја изгласале програмата за работа на ова претпријатие ќе бидат единствени одговорни доколку се наруши одржувањето на хигиената во градот. Таа смета дека е непринципиелно и недозволиво да ја злоупотребуваат својата функција за водење дневна политика, реваншизам и создавање хаос во работењето на градот и јавните претпријатија.

Мазнева потсети дека советниците се избрани во Советот од скопјани за застапување на нивните интереси, за да ја унапредат работата на службите на градот и да бидат нивен сервис и дека тие имаат одговорност пред граѓаните, а не пред партиските лидери.

Советниците и советничките групи на сите политички партии на последната седница на Советот на Град Скопје кои одлучија да ја блокираат работата на јавното претпријатие „Комунална хигиена“, со неизгласување на инвестициските програми се единствено одговорни за евентуално нарушување на хигиената во градот Скопје – рече Мазнева на денешната прес конференција, појаснувајќи дека со предложените програми за работа  се предвидува целосна реорганизација и модернизација на претпријатието.

Таа рече дека пред советниците била доставена предлог – програма во која се предвидени дополнителни инвестиции во модерна опрема за одржување на јавната хигиена, набавка на нови контејнери кои ќе се постават на нови локации, нови специјални комунални возила поради зголемување на ефикасноста со справување со комуналниот отпад, како и дополнителни сезонски работници.

Апелирам до сите советници во Советот на Град Скопје, а особено до оние кои ја промовираа програмата „За модерно Скопје“ ветувајќи дека целосно ќе ја поддржат и во Советот на Градот, сега да не се повлекуваат и да не ја злоупотребуваат довербата на граѓаните – истакна директорката на Комунална хигиена.