Голема семејна трагедија отвори равенка со многу непознати, откако трочлено семејство од Скопје, сопруг, сопруга и баба, се затруле со отров „метомил“ или попознат како „Ланате“ откако јаделе домашно подготвена пита со праз. Според информации на „Слободен печат“ семејството имало мала бавча во дворот на куќата. Жената починала како последица на пестицидот „Ланате“, а телото е предадено на обдукција. Нејзиниот сопруг, како што за „Слободен печат“ информира директорот на Клиниката за токсикологија доктор Генц Селмани, е во стабилна состојба.

-Бабата не е хоспитализирана на нашата Клиника, туку на друга. Пациентот кој е примен на нашата клиника е стабилен. Од симптомите карактеристично е што имаше повраќање и изнемоштеност, изјави доктор Селмани за „Слободен печат“.

Тој е матичен лекар по семејна медицина од Кичево, па на прашањето на „Слободен печат“ дали гледал и други случаи со труења со „Ланате“ на Клиниката за токсикологија одговори негативно, но од работното искуство во Кичево, рече дека гледал такви случаи.

-Јас бев вработен во Кичево и искуствено, за тој регион, инциденцата за тој регион е 12-13 случаи годишно на појава на пациенти затруени со овој отров, ни објасни доктор Селмани.

Дали отровот бил во питата со праз, или пак на друг начин бил проголтан, треба да покаже истрагата, но и обдукцијата. Токму Клиниката за токсикологија во Министерството за внатрешни работи пријавила дека на 15-ти октомври кај нив за укажување лекарска помош биле донесени 79-годишната Ц.С., 55-годишниот Ѓ.С. и 47-годишната Д.Ќ сите од Скопје, затруени од домашна храна која била направена во нивниот семеен дом во Скопје. Д.Ќ. почина во болница, 79-годишната жена е во кома по преживеан срцев удар, а мажот е стабилен.

„Известен е јавен обвинител. Од местото на настанот подигнати се доказни материјали за вештачење и се преземаат мерки за расчистување на случајот. На 19 октомври од Комплексот Клиники „Мајка Тереза“ е добиено известување дека едно од лицата починало и телото е дадено за обдукција“, велат од МВР за „Слободен печат“.

Метомил или „Ланате“ во земјава е забрането да се употребува, согласно регулативите на Европската Унија. Причината е што само еден грам е доволен да усмрти човек со тежина од 70 килограми, односно станува збор за висока токсичност на препаратот. Овој инсектицид нема канцерогени дејства, но тоа што може да се злоупотреби, како што и се злоупотребува за труење на улични кучиња, го става на листата на забранети состојки. Како „Ланате“ се нашол во домот на семејството, од каде го набавиле и за која намена, треба да покаже истрагата. Од Јавното обвинителство за „Слободен печат“ потврдија дека преземаат истражни дејствија и ќе информираат откако ќе заврши истрагата. Симптомите од метомил се тоа што се јавуваат проблеми со дишењето, проблеми со чукањето на срцето и тремор и зависно од количината зависи за колку време ќе настапи смртта. Дури и ако рокот на употреба на метомилот е поминат, отровното дејство може да трае и до 10 години.

-Ланете е забранет во продажба веќе 7 или повеќе години. А за секој пестицид има упатство колку се става, кога и каде. Кај нас во старото маало редовно го наоѓавме по тревата каде што играа кучињата, ама и редовно наоѓавме умрени бездомни кучиња. Следевме секој ден и фативме жена како со ракавици го расфрла по тревата и ја пријавивме во полиција. На таа трева играа и деца. Среќа и дете што не изгубивме. Во тоа време, беше дозволен, но точно се знаеше кога и во која количина. Епилогот не го разбравме, вели Мими Кимовска Христов од Скопје.

Од Организацијата за заштита на животните „Анима мунди“ велат дека години наназад сведочат злоупотреба на смртоносни отрови, нивно расфрлање по високо фреквентни јавни површини меѓу кои паркови, училишни дворови, детски игралишта, околу влезови и ресторани повеќето со безбедносни камери што би послужиле како доказен материјал за пронаоѓање на сторителот, масовни труења животни со супстанци кои за десетина минути, по само вдишување и на најлош можен начин убиваат животни кои тежат и повеќе од 40 килограми.

Сега цело семејство е жртва на страотниот пестицид Ланате, при што е почината млада жена и две деца се борат за живот. Најдлабоко жалиме за оваа страотна трагедија и сочувствуваме со семејството. Предупредувавме дека е прашање на време кога ќе настрада човек, велат од „Анима Мунди“.

Тие подолго време бараа истраги на терен за злоупотребата на метомил за труењето на уличните кучиња. Злонамерниците го подметнуваа отровот во виршли, месо, леб, за да ги намамат и убијат уличните бездомни животни во земјава.

Но од страна на институциите со прст не е мрднато, ниту една мерка никогаш немаат преземено освен повремено декларативно ветување пред јавноста во функција на пи-ар, а најчесто игнорирање и молк“