Матурантите в сабота ќе го полагаат изборниот екстерен испит, најмногу пријавени за тестот по Англиски јазик
Вториот изборен екстерен испит од државната матура се полага в сабота. Како и во минатите години, најмногу кандидати (13.198) се пријавени за тестот по Англиски јазик. Испит по Математика ќе полагаат 1.356, за Германски јазик се пријавени 114, 37 за Француски јазик, 84 за Естетика и по еден кандидат за Руски јазик и за Филозофија.
Препорачано
Најдоцна до 8 јули Државниот испитен центар (ДИЦ) ќе ги објави резултатите од полагањето на двата екстерни испита. Дотогаш треба да има и одлука од комисиите на ДИЦ за поништување на тестови за првиот и за вториот екстерен испит доколку се утврдат прекршувања на правилата на самото полагање или ако се констатираат нерегуларности т.е. преписи при оценувањето на тестовите.
Според видот на образование, државна матура во јунската сесија полагаат 6.341 матуранти од гимназии, 8.230 од стручни и 263 од уметнички училишта.
Матурантите кои во јунската сесија нема да ја положат државната матура или не во целост ќе може да се пријават за августовската сесија кога двата екстерни испита ќе се полагаат на 12 и 14 август 2024.
Минатата сабота матурантите го полагаа првиот, задолжителен екстерен испит – Мајчин јазик (Македонски/Албански/Турски) и литература.
Матурантите од државава формираа Вибер група, излегоа информации дека масовно се препишувало. Во гостување на утринската емисија „Слободен печат“ директорката на Државниот испитен центар, Билјана Михајловска изјави дека препишувачите го извлекуваат најдебелиот крај. Секој носи одговорност за она што го прави. Тоа што нема одговорност за одредени луѓе законски дефинирана е пропуст на законите.
– Некои од учениците не го испочитувале правилото да не користат мобилни телефони, но не го испочитувале правилото ниту возрасните кои требало да им предочат дека не треба да го прават тоа или доколку забележале да им го одземат телефонот, да ги отстранат да го испитаат. Бидејќи тоа се правилата што се уредени со правилници, дека ученикот мора да го остави телефонот на влез, а дека ако влезе на испит, извади телефон, тогаш тестаторот е должен да го отстрани од испитаат. Значи, тука правилата не ги почитувале ниту учениците, ниту оние тестатори каде што имало такви ученици. Среќа не се многу-вели Михајловска.
