Некои средни училишта во земјава го прекршија договорот според кој тие се должни да ги споделат материјалите за интерните испити најдоцна три недели пред денот на испитот, се вели во писмото на Средношколскиот Сојуз на средношколци испратено до премиерот Зоран Заев, министерката за образование и наука Мила Царовска и директорката на Државниот испитен центар, Елизабета Наумовска.

Матурантите испратија предупредување до функционерите со кои го постигнаа компромисот за модифицираниот модел за полагање на државната матура, истакнувајќи дека тие им ветиле на сите матуранти дека договорот нема да остане само на хартија.

Според постигнатиот договор, наставниците се должни на учениците да им дадат најмалку 60, а најмногу 100 прашања за интерните испити кои ќе се полагаат за време на државната матура, но сепак некои професори одбивале да го направат тоа, а во писмото е откриено и за кои училишта се работи.

– Матурантите го информираа Сојузот дека одредени професори од некои средни училишта изјавиле дека нема да почитуваат одредени точки во договорот постигнат меѓу нас. Ова е неприфатливо. Станува збор за следниве училишта: СОУ „Ѓорче Петров“, СОУ „Орде Чопела“, СОУ „Ристе Ристески – Ричко“, СОУ Гимназија „Мирче Ацев“, СОУ „Кузман Јосифоски – Питу“, СОУ „Јосип Броз Тито“ -Битола, СОУ „Др. Јован Калаузи“, СОУ „Св. Клименти Охридски“ – гимназија Охрид, СОУ „Никола Штејн-Тетово“ и СОУ „8-Септември-Тетово“ – стои во писмото на матурантите.

Како што вели и лидерот на Средношколскиот Сојуз за „Слободен печат“, Бленди Ходаи, имало и такви професори кои давале прашања, меѓутоа истовремено потенцирале дека ниту едно од нив нема да го има на матурскиот испит.

– Имавме случај со професорка во Охрид која на учениците им дала 60 прашања, велејќи: „еве ви ги прашањата како што се вели во договорот, но ниту едно од нив нема да го има во испитот“, објаснува Ходаи.

Поради сето ова, матурантите од Заев, Царовска и Наумовска побараа интервенции, со цел сите средни училишта истовремено да го почитуваат и спроведуваат договорот.