Во населеното место Марино во општина Илинден е изграден нов урбан парк со повеќе содржини, кој се простира на површина од 6000 метри квадратни.

Од Општината информираат дека целиот простор е партерно уреден, поставено е улично осветлување, чешми, клупи, корпи за отпадоци, паркинг простор, пешачки патеки и пристапна сервисна улица. Во паркот е изведен и отворен плоштад наменет за јавни настани, фонтана, жардиниери со декоративни растенија, како и детско игралиште опремено со современи реквизити за најмладите.

Градоначалникот на општина Илинден, Александар Георгиевски, кој денеска го посети  плоштадот, истакна дека уредувањето на јавните простори е од суштинско значење за подобрување на условите за одмор и рекреација на граѓаните.