Во завршна фаза е уредувањето на новиот владин кабинет. Мандатарот од СДСМ Димитар Ковачевски најавил големо изненадување, но засега не се открива дали изненадувањето ќе биде партиски кадар или надворешно лице.

Ковачевски на вчерашната средба со владиниот партнер, лидерот на ДУИ Али Ахмети, требаше да ги потврдат ресорите со кои ќе раководат интегративците, да разговараат за кадрите што новиот премиер ги планира од редовите на СДСМ за министерските позиции, за средбите со помалите коалициски партнери што треба да завршат денеска и за владината програма која веќе се изработува, дознава „Слободен печат“ од извори во Владата.

На средбата се очекуваше да биде потврдено дека Ахмети нема да направи промени на своите кадри и дека со ресорот образование во новата влада ќе раководи министерот Јетон Шаќири, кој досега беше министер за информатичко општество и администрација. Другите министри од ДУИ остануваат на позициите со кои раководат – Артан Груби пак ќе биде прв вицепремиер, Фатмир Бесими министер за финансии, Крешник Бектеши за економија, Бујар Османи за надворешни работи и Насер Нуредини за животна средина.

Мандатарот Ковачевски со најтесното партиско раководство денеска ќе го состави списокот со кандидатите за министри од СДСМ, по што за него треба да расправа Извршниот одбор, а в недела Централниот одбор ќе треба да ги потврди имињата на министрите од СДСМ во новата влада.

Според информации на „Слободен печат“, Ковачевски на средбите со помалите коалициски партнери најавил дека и во новиот владин тим ќе има најмалку еднаков број министерки, како во претходната влада на Зоран Заев, односно најавите се дека половина од министрите предложени од СДСМ ќе бидат жени. Во владата на Заев од 10 министерски позиции на кои беа кадри на СДСМ, четири ги предводеа жени, и тоа ресорите одбрана, труд и социјала, образование и култура.

Според наши информации, мандатарот веќе се сретнал со претставници на НСДП и со ЛДП. Денеска треба да се сретне со Павле Трајанов од Демократскиот сојуз и со Маја Морачанин од ДОМ. Како што дознаваме, во новата влада дефинитивно ќе нема министерство за помалите коалициски партнери, освен актуелното за локална самоуправа со кое раководи Горан Милевски од ЛДП. Според наши информации, откако НСДП одбила за ресорот труд и социјала да ја номинира пратеничката Соња Мираковска, Ковачевски пресекол дека и за тоа министерство кандидатот ќе биде од СДСМ, односно дека ќе нема прераспределба на ресори за помалите партии.

Неофицијално, Ковачевски инсистирал токму Мираковска да го предводи ресорот труд и социјала, но ова било неприфатливо за НСДП, бидејќи со тоа партијата во Собранието ќе остане само со еден пратеник, бидејќи следниот на листата по Мираковска е од редовите на СДСМ. Ставот на партијата бил дека не би жртвувале пратеничко место за министерска функција и ова според наши информации, Тито Петковски му го соопштил на Ковачевски.

Помалите партии добиле уверување дека дел од нивните битни проекти ќе бидат содржани во новата владина програма. Според информациите, прифатено било да има измени на изборниот модел, односно наместо шест да има една изборна единица, да се либерализираат криптовалутите и да се гради ски-центар на Пелистер.

На забелешките од помалите коалициски партнери за бавната реализација на проектите, интересно е дека Ковачевски најавил дека планира да ангажира експерти од странство, кои ќе бидат задолжени роковите за спроведување на проектите. НСДП предложила проекти од енергетика, односно годинава да почне изградба барем на една хидроцентрала од проектот „Вардарска долина“, државата да закупи 200 мегават-часови од европска земја што гради нуклеарна централа, да се детектираат потенцијални локации за геотермални централи, да се воведе полициски омбудсман, како и проекти од образованието, културата и од екологијата.

Мандатарот сè уште ги држи во тајност кандидатите за министри од СДСМ и наводно за имињата не разговарал ниту со помалите коалициски партнери. Неофицијално, од актуелните во Владата остануваат Фатмир Битиќи, вицепремиер за економски прашања, Бојан Маричиќ од правда се сели во ресорот евроинтеграции, а Благој Бочварски останува во транспорт и врски. Сите други позиции се отворени.