Италијанскиот фудбалски клуб Милан е во преговори со Манчестер јунајтед за да го ангажира данскиот напаѓач Расмус Хојлунд на позајмица, а „росонерите“ се уверени дека наскоро ќе биде постигнат договор.

Според информациите од „Гаѕета дело Спорт“, Милан и Јунајтед разговараат за договор што би го довел 22-годишниот напаѓач на „Сан Сиро“ за сезоната 2025/2026.

Англискиот клуб е отворен за идејата да го пушти по само две години во Премиер лигата, каде што играчот не покажа конзистентност во својата игра. Доаѓањето на Матеуш Куња и речиси сигурното доаѓање на Бенјамин Шешко дополнително ги намалуваат шансите на Хојлунд за редовен настап.

Милан е подготвен целосно да ја покрие неговата плата, што е околу четири милиони евра годишно. „Црвените ѓаволи“ првично побараа поголем износ од оној што Италијанците се подготвени да го платат за позајмицата. Милан инсистира цената да остане под шест милиони евра за да избегне задолжителна клаузула за откуп што би можела да ја зголеми цената на трансферот на околу 35 милиони евра.

Доколку преговорите за Хојлунд се одложат или пропаднат, „росонерите“ разгледуваат и други опции како што се Николас Џексон и Гонзало Рамос.